美味嘅灰水粽

每年嘅端午节，粽仔就会成为热门话题，比如粽仔应该咸味定甜味先至正宗。对于广州人来讲，咸味甜味都冇问题。正所谓咸有咸食，甜有甜食。肉粽系咸嘅，碱水粽就可以系食甜嘅。

广州话将碱水粽叫“灰水粽”，呢几日天时暑热，成咗唔少街坊应节兼解暑嘅美食。点解叫“灰水”，原来旧阵时，用来整粽仔嘅碱水，系用植物烧完后嘅灰做出来嘅。喺广州嘅郊区，加阵仲有啲农家会用呢种办法。譬如，农田割禾后，将晒干嘅禾秆烧成灰，然后将佢放入竹筐，用滚水淋洒、过滤等，经过几道工序后，就可以得到一种棕黄色嘅碱性液体，佢就喺灰水。据说，除咗禾秆，用鸭脚木等本身带有香味嘅树木嘅灰，亦可以制作，而且整出嘅灰水棕，仲会带有某种植物特有嘅天然香味添。

制作灰水粽，需要耐性，首先要将糯米用灰水浸泡几个钟，然后先可以包粽仔；包完仲要用锅煮八个钟以上，咁样先可以令糯米完全吸水、软化，变得香嫩软熟，入口先好味道。我记得旧时，食灰水粽基本系直接点砂糖食。喺热辣辣嘅天时，甚至唔需要将粽仔加热，冻冻哋就住砂糖，有一种天然爽甜嘅口感，简直比雪糕之类更加好味。不过加阵物质丰富咗，佢嘅食法亦多咗，可以点糖水、点蜂蜜，甚至淋上忌廉。

◎闻歌 媒体人